- 009 -
1470 (8. listopada) Bratysława, we wtorek po św. Emeryku etc.
Pismo króla Macieja KorwinaMaciej Korwin (łac.: Matthias Corvinus, węg.: Hunyadi Mátyás, zwany Sprawiedliwym, węg. Igazságos), król Węgier, Chorwacji od 1458 i Czech od 1469 roku. do rajców miasta Wrocławia w sprawie zmiany monety.
Mathias von gots gnaden kunik zu Hungern zu Behem etc. marggrave zu Merhern hertzog in der Slesien und in Lawsnitz etc.
— Ersam weis lieben getrewen. Uns zweivelt nicht ew sey wissentlich, als wir am jungisten bey ew zu Wressla sein gebesen, daz wir nach ewrem begern ew dozumal zu munsen nach ewrem gevallen genediklich geurlaubt haben, wie auch nachmalen ir durch ewr botschafft weiter an uns bringen und begeren habt lassen, dieselben munsz den gulden auf viertzigk groschen zu hohern, das wir ew dotzumal auch vergünnet haben. Darnach habt ir in ander weg von derselben munsz wegen durch ewer botschafft uns angelangt, daz die obgemelten viertzig groschen auf das korn und aufzal der ersten munsz, so dreiszigk groschen fur ain gulden gangen sein, sollten gemunst werden, sein wir underricht, daz unser kuniglichen kamer dardurch und in ander weg merklicher abgang und unserm furnemen und sachen den heyligen gelauben antreffund nicht ain klaine hindrung daraus entstund. Darumb so begeren wir an ew mit ernst vestiklich gepietund, daz ir die munsz, so yecz bey ew geslagen und als hernach begriffen ist gemunst sol werden, behandelt und allenthalben auf ewrm gebiete und kain andre verpottne munsz zenemen ruffen und zu sand Elspeten tag nachskunftig an ewrem iarmarkt angeen lasset ungeverlich. Haben wir unserm getrewen Herman Silberprenner unserm munsmaister unser gesworen gegenschreiber und probirer zugeordent und bei in ernstlich bestellet, daz sy dem korn und aufzal der vorgeschriben munsz, das ist hundert und XVIII grosch auf die Wienner mark, die funfft lot feines silbers haben sol, viertzigk groschen fur ain gulden, achtzigk halb groschen fur ain gulden, zwelf haller fur ain groschen und sechs haller fur ainen halben groschen munszen und daran nichts entziehen werden, wir auch die zu verkeren in dhainerlay weis maynen. Deshalben ir uns nicht weiter anlangen sunder solh munsz angen lasset als vorstet bey vermeidung unser swerer ungnad und straff, angesehen daz wir mit solher munsz in disen kriegsleufften unser soldner yetz und hinfur zu entrichten unserm lieben getrewen Franntzen vom Haag unserm haubtman in der Slesy empfolhen haben. Daran tut ir unser ernstlich maynung.
Geben in unserer stat Prespurg an pfintztag nach Emerici anno domini etc. LX°, unserer reich des Hungrischen im dreytzehenden und des Behemischen im andern iaren.
Mathias Rex manu nostra propria.